Энэ нутагт чоно, үнэг, мануул, хүрэн туулай, тарвага, дорго, аргаль, угалз, янгир, цагаан зээр, хар сүүлт мэтийн ан амьтан, хун, галуу, нугас, тоодог, тогоруу, ангир, ёл, тас, буүргэд, цагаан хар элээ, хэрээ, цахлай, бор, шар шувуу, харцага, ятуу, хөтүү, болжмор, хулан жороо, тагтаа зэрэг жигүүртэн шувуудтай. Могой, хонин болон могой гүрвэл, голио, хар ногоон тонголдой, хар хорхой зэрэг мөлхөгчид, зэрлэг гахай, буга согоо, ирвэс үзэгддэг. Энд амьдарч байсан бөхөн гөрөөс хотон шувууд сүүлийн жилүүдэд үзэгдэхээ больсон байна.

Хуйхан цахирын уланд байдаг Гандгир (ганцхан мод), Цагаанхайрханы хальс, Хутаг уулсын ус шуугидаг хөндий хад, Ханын худгийн ард байдаг уст уул, Шавгийн гацаан дахь чихэр өвстай тохой, Харцагатын Улааны хаднаас ургасан харгана, засч бэлтгэсэн юм шиг элсний их сүв зэрэг элсний зам гарцууд, Их, Бага Нарт зэрэг ууланд байгаа амьтны сүг бичиг бүхий хад, сумын нутгийг хамарсан олон тооны хиргисүүр, Сайрын адгийн хөшөө, Баян-Улааны зуун хойд талын хун чулуу зэрэг байгалийн баялаг, түүхийн дурсгал ихтэй. Мөн хүний хоол боловсруулах эрхтэн, хоолойн ангина өвчин анагаах чадвартай Голын улааны хүйтэн рашаан бий. Голын улааны хаданд, Загастайн түнгэнд рашаан байсан гэх боловч одоо мэдэх хүнгүй болжээ.